الخميس، 31 يوليو 2008

غباء فى ذكاء ( ومحدش فاهم حاجة )


بصو بقة فى موضوع عجيب ( على اساس ان المواضيع التانية مش عاجيبة)

المهم الموضوع عن الذكاء والغباء 
انا لاحظت ان الذكاء والغباء للاسف ملهاش معايير
ايوة ملهاش معايير سيبكوا من اختبرات الذكاء ديه
ديه انا باعتبرها اختبرات غباء مع احترامى للعلماء اللى عملوها
يعنى كان فى علم النفس فى الثانوية  الاستاذ كان جابلنا اختبار ذكاء
بتاع عالم ماشهور كده المهم يعنى طلع عارفين حاجة زى اسئلة قناة استريك ومزيكا كده
حاجة تشل ملهاش علاقة بالذكاء والغباء
غير كده كان فى اختبار شوفتوا على النت بيقلك بيل جيتس جاب فى 4 نقاط بس
وانا جبت 4 بردو تقريبا ... معنا كده انى هبقة اغنى حد فى العالم!!
 غير كده
فى ناس جابت اعلى من اربعة وهيه ناس عادية يعنى مش عباقرة
الهم نسبنا من حوار الاختبارت ده الموضوع اللى معقدنى بقة انى
لاحظت ان فى ناس بتبص لناس على انهم اغبية مع انهم اكتر منهم فى الذكاء ( متنسوش انى ديه وجهة ناظرى انهم اكنر منهم فى الذكاء)
مش بقلكم موضوع معقد ...
وفى ناس بتبص على ناس على انهم عباقرة  وهما مش كده خالص (ده برده وجهة ناظرى)
مين بقة يقدر يحدد فعلن الذكى من الغبى
هتقولوا اذكى واحد طبعا
طيب مين هيحدد اذكى واحد اصلن مش ممكن يكون هوه غبى واحنا مجرد اغبى منه
مش ممكن يكون كل الناس اغبية بس بدرجات 
هوه موضوع  معقد مش عارف انا علمتو ليه اصلا بس بجد هوه معقدنى فقلت لازم تشركونى المرح 
واخير ممكن ناس تفتكر ان الكلام ال انا  قلتو ده اغبى كلام ممكن يتقال وممكن ناس تفتكر العكس
دماغى هتفرقع ....
بجد مش قادر اكمل عشان الموضوع ميتعقدش اكتر من كده
سلام بقة









الاثنين، 28 يوليو 2008

جالى تاج يا ولاد


فى الاول احب اشكر الزميلة المدونة

miada ref3at

على التاج الجميل ده

اى نعم هوه مش على مقاسى قوى

بس مشكلة اى ترزى هيعرف يزبطة

 

تانى حاجة

موضوع التاج ده  لسه واخد بالى منه وانا بشوف المدونات

وكان نفسى اعرف مين اول واحد طلع بالفكرة ديه

(لو حد يعرف يقلى )

وقلت كمان فى بالى التاج ده للناس المعدية اللى بقلها كتير فى عالم التدوين

انا لسه بدرى عليه لما اخد تاج او حتى كاب

ببص النهاردة لقيت التاج مبعتلى

فرحت بس فى نفس الوقت حاسيت انى اتدبست

بس الحلو فى الموضع ان معظم الاسئلة ديه اتسئلتها قبل كده

فهيسهل الموضوع علية

بينى وبينكوا انا اتهريت اسئلة

وانا بعشق حاجة اسمها اسئلة

وبموت فى حاجة اسمها حرف استفهام

المهم...

ادينى هجاوب اهوه وربنا معنا بقة

 

أعطيتك ثلاث وردات .. من هم الثلاث أشخاص اللى هتعطيهم الورد اللى معاك..؟

-الاولى: هديها لبابا

والتانية : ماما

والتالتة : مش للاخوة والاقارب لا

التالتة هشيلها لشخص لسه مقبلتهوش ولا عرفتو

بس انا عارف ان مكتوبلى اقبله واعرفه

فى يوم من الايام... وسعاته هيبقة احق حد بيها

(ادعولى اقبلها)

لو أعطيتك ورقه فيها 3 سطور وقلتلك اكتب فيها اللى انت عاوزه هتكتب ايه..؟

-مش عارف ايه البخل ده ليه مش ورقة فلوسكاب

او ورقة من نص الكشكول حتى

ما علينا

لو 3 بس

مش عارف بجد هكتب ايه

بس ممكن اكتب فيها وصيتى

هكتب:

لكل حد زعل منى فى يوم : انا اسف

لكل حد حبيته: انا بحبك

لكل الناس : حبو بعض عشان تعرفوا تعيشو

 

المقولة" إن شاء الله بكرة هيكون أحسن من النهاردة" هل تصدق هذه المقوله ولماذا؟؟

-بكرة ديه مفتوحة اوى ممكن يبقة بكرة القريب وممكن بكرة البعيد شوية كمان كام سنة

وممكن بكرة بقة البعيد اوى بتاع الاجيال القادمة

بالنسبة لبكرة القريب اتمنى يكون احسن بالنسبالى

بس بالنسبة لمصر عام اتمنى برده بس معتقدش يعنى انه هيبقة احسن كتير

بالنسبة لبكرة البعيد بقة

بالنسبالى عندى امل كبير انه هيبقة احسن بكتير

بالنسة لمصر معتقدش برده انه هيتحسن اوى

بالنسبة لبكرة البعيد اوى

اتمنى اكون فى الجنة بقة

اما بالنسبة لمصر اعتقد انها ممكن تكون احسن

ميين عارف

أجمل مقوله سمعتها فى حياتك؟

كتير مفيش حاجة معينة فى بالى دلوقتى


من المغنى اللى بتحبه أوى ؟

-بصوا بقة انا مبحبش حوار المغنى المفضل والكلام ده

فى حاجة اسمها اغنية حلوة اوغنية مش حلوة

مهو ممكن مغنى كويس بس مش كل اغانيه حلوة

وممكن مغنى مش اد كده ويطلع اغنية تحفة ميعملش غيرها فى حياته

بس عموما انا معنديش حد مجنون بيه يعنى عشان الواحد بيحب الاغنية مش

المغنى عشان انا معرفش المغنى شخصيا عشان احبه

بس ممكن فى القديم

عبد الحليم وفيروز

وفى الجديد

عمرو دياب ومحمد عدوية ولؤى

وفرقة وسط البلد

وفى الاجنبى بقة

Westlife-coldplay

و إيه أحلى أغنية بتحبها ؟؟

 - كل قت وبيقة ليه اغنية مفضل حسب الموود بتاع الوحد

بس انا بقالى فترة طويلة معلقة معايا اغنية اسمها

All The Same - Sick Puppies

غزه..تمثللك ايه فى حياتك..؟

غزة بتجسد الالم العربى

بتجسد معناة شعب

بتجسد الخيبة اللى احنا فيها

والشجاعه اللى اهل غزة فيها

 

إعطى لانتمائك لوطنك درجه من مائه

- معتقدش ان الحجات ديه فيها كام فى المية

الحب مفهوش حسابات انت يابتحب يامبتحبش

وانا بحب مصرى ونفسى ترجع احسن بلد فى الدنيا زى زمان

وان شاء الله هفضل فيها لحد ماشوفها كده

لو تزوجت وانجبنت..بنتين وولدين..هتسميهم ايه..؟

وهصرف عليهم ازاى دول طيب

ده عقبال ماجى اتجوز واخلف هيكونوا عملوا ضرايب على العيال

وعلى اساميهم يعنى كل مكان اسم ابنك طويل كل مدفعت اكتر

يعنى الاغنية بس اللى هيسموا اسامى مركبة

يعنى لو واحد اسمه عبد الرحمن

تعرف على طول انه اهله حالتهم المادية كويسة

ما علينا

ممكن اسمى الولدين

واحد عَمر و عمرو

عشان يتلخبطوا مع بعض بقة

والبنتين

واحدة نور والتانية نورة

عشان يتلخبطوا برده

عشان البيت كله يخش فى بعضه

عمرك غشيت فى امتحان وانت صغير..؟

-اه جينا بقة للاسئلة اللى مش بحبها

انا فى ابتدائى كنت من الطلبة الشطرين جدا

كنت بطلع ال 12 على الفصل

وهوه الفصل 15 واحد اصلا

بس برده واخد مركز

فمكنتش بحتاج اغش والكلام ده

وبعدين مكنتش فى مصر فمكنش الغش منتشر زى عندنا كده

 

لو أتعرض عليك رشوة كبيرة و انت فى زنقة مالية هتعمل إيه؟؟

- محصلتش قبل كده عشان كده مجربتش قوتى فى الحتة ديه قبل كده

بس المال الحرام ده بيودى النار عدل فبلاش منه حتى لو هيجى من وراه ملايين

قول 3 صفات بـ 3 كلمات بس توصف بيهم شخصيتك؟؟

- طيب - مختلف – كسلان ( ان شاء الله هغير الصفة ديه)

صفه عاوزاها فى شريك حياتك

- العقل

إيه اللى غير دراستك وشايف نفسك فيه قوي ؟

- فيه التصوير الفوتغرافى واخراج الافلام

بتحب السفر ؟؟

-اه جدا انا مش بسافر كتير بس بحب السفر جدا

طب دلوقتى حالا ايه المكان اللى نفسك تكون فيه ؟

- نفسى اروح قدام البحر عشان وحشنى جدا

تمرر التاج ده لمين ؟؟

- همرره لاختى vanilla

اللى دخلتنى هنا عالم المدونات

اول حاجة وهشوف بقة الناس اللى موصلهاش التاج بقة اودهولهم

وربنا معاهم

الطفل و الترمس


هوه ممكن  العنوان غريب شوية

بس معلش لما تشوفوا اللى حصل هتعرفوا انا قصدى ايه
نبدأ القصة...
امبارح وانا رايح النادى كان فيه عيل صغير مامته معاه
وكان معاه كيس ترمس ... المهم وهوه بياكل منه وقعت ترمساية منه فى الارض
فحاول يخدها من على الارض (طبعا الارض مش نضيفة ) وكان مُصر يخدها
وومامته تقله سيبها خلاص (كان فى  الكيس غيرها كتير) بس هوه مصمم ياخدها
وفضل يعيط عشان مخدهاش وبعدين سلم للامر الواقع وكل من اللى معاه فى الكيس.

الموقف يبان عادى جدا وممكن يكون عدى عليكو  موقف مشابه قبل كده

بس انا كنت مستغرب جدا هوه ليه مُصر اوى كده انه ياخدها!! بس قلت ده طفل يعنى عادى الاطفال
بيعملوا حجات غريبة كتير عشان الادراك عندهم مش مكتمل 
وبعدين اكتشفت حاجة غريبة جدا...ان فى مننا كتيير زى الطفل ده
يعنى سعات الواحد لما حاجة بتضيع منه بيفضل يحاول يرجعها تانى حتى لو مش محتجها
ومعاه غيرها او ممكن يعوضها ويزعل جدا لما الحاجة ديه تضيع منه
مش عارف بقة اذا كان ده نقص ادراك زى الطفل ولا ده حب تملك ولا ايه بالظبط
بس اللى لاحظتوا ان فى مننا كتير بيكبر فى السن ولسه الطفل اللى جواه مكبرش
سعات كتير بنتصرف زى الاطفال واحنا مش وخدين بالنا
لما نشبط فى حاجة او لما تقع فى ادينا لعبة  نلعب بيها او لما نشوف حاجة فى ايد غيرنا نبقة نفسنا فيها
واحنا معانا اللى احسن منها..حجات كتير اوى
مش عارف برده هوه المفروض الطفل اللى جوانا ده مفروض يفضل موجود كده زى ماهوه ولا لازم يكبر؟؟
طب لو كبر شخصيتنا هتبقة احسن ولا اوحش ؟؟ يعنى ممكن يكون الطفل ده عامل موازنة مثلا فى الشخصية؟؟
...مش عارف ....
يجد مش عارف!!


السبت، 26 يوليو 2008

بــــعينى


انا قلتلكوا قبل كده انى بحب التصوير...صح...
ولو مقلتش اديكوا عرفتوا..المهم...
التصوير بدأ معايا على كبر يعنى مكتشفتش الموضوع ده غير على كبر كده
يعنى زمان كان عندنا كاميرا (كودك) من اللى هيه بفيلم مش ديجيتل يعنى
بس مكنتش بصور بيها اوى فين وفين لما حد يقلى صور اروح مصور بس على كده
اول بقة مربنا كرمنى و جبت موبيايل فى كاميرا ..لا لا لا  قبل كده
لما ربنا كرم اختى الكبيرة الاول وجابت موبايل بكاميرا
من اول يوم جبيتو وانا مبطلتش تصوير فضلت اصور كل حاجة واى حاجة
كنت عامل زى سبيدر مان لما اكتشف قدراته اول متحول كده
واكتشفش الحمد لله انى عندى الموهبة كانت الصور اللى بصورها بتعجب الناس جدا
والناس اللى بتكلم عليهم دول هما اهلى عشان هما بس اللى كانوا
بيشوفوا الصور ديه تقريبا
فلما انا جبت موبايل بكاميرا بقة  بقيت اصور اكتر بكتير اصور كل حاجة برده 
وبقة فى ناس تنية بقة بتقدر موهبتى اللى هما بقة صحابى بقيت المصور المعتمد 
اى احتفلات او اجتماعت او حاتة تهييس كده انا اللى بصور  و الحمد لله كنت بطلع حاجات حلوة
محدش بيطلعها غيرى ...
المرحلة اللى بعدها بقة لما بابايا ربنا يكرمه كده يارب جابلنا  كاميرا ديجيتل بقة 
بعد ماكنت خلاص اتعقدت من الكاميرا بتاعة الموبايل لانها مكنتش بترضى كل طموحاتى فى التصوير
طبعا مستوايا اتنقل نقلة نوعية (حلوة نقلة نوعية ديه ) فى التصوير بس كاميرات الموبايل بقة
مبقتش اطيق اصور بيها (شوفوا البنى ادم ) مع انها كانت حبيبتى زمان بس هيه برده ليها معزة عندى
وسعات بصور بها لما اتزنق
حاسس انى رغيت كتير هكملكوا موضوع التصوير ده فى موضوع تانى ان شاء الله اصله موضع كبير


ديه صورة لمبة الاوضة بتعتى عادى يعنى


وده الماوس بتاعى برده عادى

وديه المشابك بس مش عادى (المعنى فى عين المصور)

ديه ورقة شجر فى الجنينة بس (بعينى انا )

ده زرار القميص بس انا مديله اهمية شوية  

واخيرا بقة ديه عينى انا شخصياً انا اللى مصورها برده

فى النهاية ممكن الصور تبقة غريبة شوية بلنسبة لناس او متعجبهمش
بس ديه بترجع لكل واحد بيبصلها من اى زاوية 
عشان كل واحد ليه عين مختلفة عن الاخرين
بس انا شايفها بعينى حلوة
_______________________________
ملحوظة : ديه مش احسن الصور اللى عندى بس ديه اللى كنت مصغر مساحتها 
من فترة فسهل ارفعها على المدونة وان شاء الله الصور الاجمد هنزلها 
فى المرات القادمة...وشكراً

الأربعاء، 23 يوليو 2008

البحر وانا



معظم الناس بتحب البحر
فيه اللى بيحب يعوم فيه وفيه اللى بيحب يتفرج عليه
وفيه اللى بيحب يتكلم معاه ويشكيلو...
بس الغريب بقة انى بحب البحر بس مبحبش اعوم فيه
بس بحب اتفرج عليه وهوه اللى بيشكيلى مش انا !!
هيه حاجة غريبة شوية بس بجد انا كل ماشوف البحر بحس انه 
بعانى كده مش عارف ليه بحس انه محبوس وعاوز يخرج بس كل مبيحاول 
يخرج بيفشل ويرجع تانى... زى ميكون كل موجه بتحاول فبتفشل
فبتيجى موجه تانية الى ما لا نهاية....
بس فى نفس الوقت بشوف فيها الاصرار على الهدف
مع انه يبان مستحيل ... بس زى مبيقلوا كفاية شرف المحاولة
مش عارف بقة اذا كان اللى انا بشوفه ده مجرد خيال وخلاص ولا ده
انعكاس لنفسيتى او لشخصيتى.... مش عارف
بس اللى انا عارف كويس ان البحر ده صعب جدا يعرف يخرج بره الحبس اللى هوه فيه
مهما حاول بس انا ان شاء الله هقدر
________________________
ملحوظة: الصورة اللى فوق ديه صورتى يعنى تابعة لحقوق الملكية الفوتوغرافية
يعنى اللى عاوز يخدها مش مشكلة 
وشكرا