السبت، 25 أكتوبر 2008

بجد مش عارف

السلام عليكم ورحمة الله وبركاته

فى الاول عاوز اقول انى اسف انى اختفيت الفترة اللى فاتت ديه
بس بجد مرييت بفترة سخيفة جدا ولحد دلوقتى بحاول اطلع منها
اللى حصل ايه بقة
صلو على النبى الاول........(عليه الصلاة والسلام)
تمام كده
اولاً: تعمل ايه لو لقيت نفسك شخصيتك بتتحول للاسوء وانت مش عارف ليه
عشان تعرف توقف ده .... وكان الواحد نازل على منحدر ومش عارف يفرمل
وممكن لو فرمل هيقع برده !!!

ثانياً: تعمل ايه لو لقيت ان فيه تضاد بين احلامك والمبادىء اللى انت طول عمر عايش بيها
ومش مجرد حلم بسيط ده حلم عمرك وبرده المبادىء هتقلب حياتك تماماً.

ثالثاً:تعمل ايه لو لقيت نفسك عاوز تبعد عن ناس بتحبهم بدون سبب منطقى
بس جواك احساس انهم مش بيحبوك وانك مش لازم تحبهم.

رابعاً: تعمل ايه لما تلاقى نفسك بتفقد ثقتك فى نفسك (شخصيتك-قدراتك-عقلك-حتى شكلك)

خامساً:تعمل ايه لما تلاقى كل الناس اللى حوليك مش حسيين بده واللى حاسس ان فى حاجة
مش قادر تقله كل ده.

يمكن انتو مش متعودين منى على بوستات بالشكل ده
بس اعزرونى كان لازم اقول الكلام ده جايز لما اكتبو
افهم حاجة من اللى بيحصل ده.... ياريت تدعولى


10 التعليقات:

vanilla يقول...

عمري ما فهمتك يا محمد .. ولا هيحصل

ربنا يهديك للي فيه خير ليك

seven يقول...

ولا انا فاهمنى برده

kochia يقول...

امممممممم
الموضوع كبير
----------
لو لقيت نفسي شخصيتي بتتحول للاسوء وانا مش عارفة ليه
عشان تعرف توقف ده ....
مفيش طريق ماشي فيه مالوش فرملة .. لازم فيه فرملة .. ولو وقعت بعد الفرملة علي الاقل هقلل سرعتي في الطريق السئ
هفرمل هفرمل فور ما ادرك ذلك
---------
متهيالي لو حلم عمري تعارض مع مبادئي هحاول اوازن بينهم
ولو مقدرتش ابدا ابدا ابدا بعد كل المحاولات بالنسبة ليا انا غالبا هروح للمبادئ
وهستعوض ربنا لانه صعب اخون نفسي هتبقي تقيلة عليا
--------
لو حد متاكدة انه بيحبني وبحبهم مش هبعد عنهم .. لو فيه شك في حبهم يبقي ابعد احسن عشان متعذبش بحبهم
--------
لو فقدت الثقة هرتكن نفسيا علي حد قريب مني واثق فيه يدعمني نفسيا لحد ما ترجعلي ثقتي
--------
لو حاسس كدة هصبر لحد ما الاقي حد يحس او لحد ما اقدر اقول لحد اللي نفسي اقوله
هصبر واجتهد
-------------

بس

واد غلبان يقول...

انت حاسس بكدة بردو
انا والله حاسس بكدة من سنتين تقريبا
والنهاردة بالذات سألت نفسى انا رايح على فيين
انا حاسس
تدهور للأسوأ فى كل حاجة
قدرات ومواهب كنت فاكرها عندك واكتشفت انك ما تعرفش عنها حاجة
كنت فاكر نفسك واد مثقف دلوقت لقيت نفسك هايف
كان عندك حلم من رابعة ابتدائى اكتشفت انه انت لا تسيب اى مبدأ اتعلمته عشان توصله وانت حتى حاسس انك مش هتوصله
انا حتى حاسس انى بدات اتخلى عن كل مبدأ او شرف اتمسكت بيه
حتى الصلاة بقيت تقيلة اوى على قلبك
لو كنت حاسس بكدة زيي فعلا يبقى فى مشكلة
بعيد عن الموضوع
انت معاك ايميلى صح؟

prince4ever يقول...

سلام عليكم يا محمد
حاسس بيك يا برنس و عارف بتبقى اد ايه فتره صعبه... بس اللي انت فيه دلوقتي اول طريق الاصلاح... كتير بنمر بفترات انحدار و ممكن انهيار اخلاقي و نفسي و علمي و الثقه في نفسنا بتبقى اندر اوي.. بس مادام وقفت ادام نفسك وقلت ستوب..ان شاء الله هتعرف تظبط امورك... و نصيحتي...خليها على الله..ارجعله بجد و هتلاقي الدنيا تمام حواليك
ماشي يا برنس
سلام
اخوك رامي...قصاصة ورق

seven يقول...

kochia
ميرسى جدا على الكلام ده
بجد ساعدنى فى حجات معينة
بجد شكرا جزيلا
_____________
واد غلبان
تمام فعلا
زى منته بتقلول كده
سبحان الله واضح انى مش انا الوحيد اللى فى الهم ده
بالنسبة للميل مش متاكد انه معايا
ابعتهولى ياريت وان شاء الله نتكلم فى يوم
قريب
_____________
prince4ever
انا شاكر جدا ليك
وان شاء الله
ربنا يعمل اللى فيه الخير

blue-wave يقول...

ايه يا كبير الكلام دا؟؟؟
مش عاجبنى يا عم
ماينفعش كدا
على فكرة انا جبت تيل فرامل جديد تحفه هابقى اسلفهولك
نفض يا عم للدنيا السودا دى مش عايز اشوفك كدا
يلا انا عازمك على على مكان تحفه بس انت وافق

Bongo يقول...

اللهم صلي و سلم و بارك علي سيدنا محمد :)

تعليق بسيط بس علي الموضوع ,

مهما كانت احلامك لو هتخالف مبادئك و اللي اتربيت عليه تبقي قلتها احسن و متعتبرهاش احلام من الأساس
و ربنا ساعتها هيساعدك تحقق حلمك بطريقة صح و من غير ما تبيع مبادئك علشان اي حد او اي حاجة ..

ثاني نقطة عايزة اقولها , انت ممكن تحس في يوم ان اللي حواليك بيكرهوك او مش بيهتموا باللي انت مهتم بيه ,, بس صدقني ده بيبقي احساس مؤقت و الأكتئاب هو اللي مخليك شايفه كده ..

حاول تبص للموضوع بنظرة تفاؤلية شوية و هتلاقي الدنيا مختلفة

مش حاجة ثابتة في الدنيا , الناس كلها شوية فوق و شوية تحت ..
انما الصح انك متخليش التحت دي تطول او تأثر علي حياتك عموما

هدعيلك ان شاء الله
و ربنا يهدي كل شباب المسلمين

ربنا يوفقك و تفائلوا بالخير تجدوه :)

سلام

seven يقول...

blue-wave
هههههه
فل بس اوعه ترجع فى كلامك
الحساب عليك بقة
هههه
-____
Bongo
شكرا على الكلام ده بجد
والحياة ماشية الحمد لله
وان شاء الله كله هيرجع زى الاول واحسن
نورتينى

موكا يقول...

مودا
انا كدا هقلق !!
فيه ايه ؟؟؟؟؟؟
بص , هو طريقه كلامك مش غريبه يعني
بس شكلك كنت مخنوق وانت بتكتب
بجد فيه ايه ؟
هي الدنيا عمرها ما بترضي حد طول الوقت
وبتيجي علينا فترات تقلب
بس ان شاء الله تعدي
ونبقه اتعلمنا منها حاجه
وانت دايماً أقوى...