الحب كده !!!

انا نفسى ابطل اسئل نفسى الاسئلة ديه
اللى بتقلب دماغى وبتضيع كل المفاهيم اللى عند الواحد
المهم يعنى
فى حجات كتير الواحد بيتولد بيها وحجات تانية بيكتسبها مع الوقت
والحجات اللى بنتولد بيها ديه بتبقة متشابهه جدا بين كل الناس
بس الحجات المكتسبة ديه بتختلف من مجتمع للتانى ومن ثقافة للتانية
المشكلة بقة ان فيه حجات مكتسبة بتتغير لما الحجات المكتسبة ديه
وللاسف لما فكرت فى الموضوع لقيت ان الحب حاجة من الحجات ديه
والموضوع ده ديقنى فعلا لانه هز اعتقادى فى الحب اكتر مهوه مهزوز
وهل اصلا الحب بيتولد مع الانسان ولا بيتعلمه
ولا شوية كده وشوية كده
طب لو احنا بتولد بيه هوه بيمر بحجات كتير بتغير فيه كتير جدا
عشان حتى الحب بيختلف من مجتمع للتانى
يعنى حسب التربية حسب البيئة حسب المجتمع
يعنى الحب فى الغرب غير الشرق غير الجنوب غير الشمال
بس سيبنا من بره خلينه فينا هنا
انا لاحظت حاجة ياريت اكون غلطان فيها
ان الناس بتتعلم الحب من التلفزيون و الاغانى
يعنى شوف اى واحد كده بيعبر لوحده عن حبه
هتلاقى مصطلحاته و حركاته وتصرفاته وكل حاجة
مستوحاه من الافلام و الاغانى
طبعا كتير جدا مش مقتنعين بكلامى
لانه بيهد احلام كتير بنوها بس انا بقول وجهة نظر
طب هقلكوا حاجة اثبتلكوا بيها وجهة نظرى
لو جبنا واحد و وحدة وحطناهم فى بيئة ميشفوش
فيها تلفزوين ولا حتى ناس بيحبوا بعض عشان ميقلدهمش
كل اللى هيفضل الحب الجسدى مش اكتر واللى هوة حاجة
غريزية بس موضوع الورد والدبديب والكلام ده
مش موجدود عشان ديه حاجة كده اختراعها الانسان
عشان يدارى موضوع الغريزة اللى فيه او بمعنى اصح
يزوقها
انا عارف ان فى ناس هتقول مين المعتوه ده او المعقد
كل واحد يقول اللى هوه عاوزه بس انا فصلت قلبى تماما
وشغلت عقلى لقيت الموضوع فى غاية المنطقية
يعنى عاوز كل حد يعرف انه مهما حب وطلع ونزل
هيفضل استنساخ من صنع التلفزيون
يعنى التلفزيون هوه اللى بيعلم الناس ازاى تحب
بصوا انا نفسى متاكد من كلامى ده 100% بس
انا شايفه منطقى لحد دلوقتى الى ان يثبت العكس

لو الحياة لعبة ليه مفهاش save ليه؟؟

كتير من الناس بتقول ان الحياة لعبة
ومع التطور مفهوم اللعبة اختلف
يعنى لوكانت الحياة لعبة كنا ببساطة عملنا save للوضع المثالى
اللى احنا عوزينه ولو حصلت حاجة وحشة نرجع نكمل من اول النقطة
اللى احنا عاوزينها...... مكنش هيبقة فيه مشاكل
لو كانت الحياة لعبة كان هيبقة المصير واحد والنهاية واحدة
لو كانت الحياة لعبة كان الواحد مش هيتحاسب لو قتل او كذب او سرق
المهم تكسب وخلاص باى طريقة
لو كانت الحياة لعبة كان الواحد مش هيفكر كتير هيحصله ايه
لو كانت الحياة لعبة كان كل اللى يموت يقدر يرجع يكمل من او وجديد
ويبتدى حياة جديدة
لو كانت الحياة لعبة مكنش هيبقة فيه حزن او غم او قرف
لو كانت الحياة لعبة كنت عملت Exit ومكملتهالش لو مش عجبانى
بس للاسف مفيش options اغير اللعبة هيه لعبة واحدة بس
لو كانت الحياة لعبة مكنتش حملتها

الخطايا

السلام عليكم ورحمة الله وبركاته

وانا عمال افكر كده كالعادة يعنى
فكرت فى ايه هيه اصل كل الخطايا
مهو كل حاجة وليها اصل
عرفين ايه هيه
(الانانية)
ايون اقلكو ازاى...
بس لما تصلوا على النبى ...
الانانية بتخلى الواحد بيفكر فى حاجة واحدة بس (المصلحة الذاتية)
يعنى لو بصنا لحاجة زى السرقة اللى بيسرق ده مبيفكرش فى اللى الشخص
اللى بيسرقو ده هيعمل ايه لما يسرق منه حاجته اهم حاجة يرضى نفسه وخلاص
وكذالك الكذب اللى بيكذب ده مش بيفكر غير انه ميطلعش شكله وحش او يطلع شكله احسن
او انه ميتعقبش مبيفكرش فى تأثير الكذبه ديه على غيره بيفكر بس فى تاثيرها عليه هوه
وممكن تطبقو النظرية ديه على كل حاجة وحشة الواحد بيعملها
بمعنى مختصر
(الانانية هيه اصل الخطيئة)
يعنى لو فكر كل واحد فى اللى حوليه شوية حلوين كده
زى مبيفكر فى نفسه الموضوع هيبقة احسن بكتير
ومش كفايا بس التفكير لازم يبقة فيه كمان اهتمام
بس للاسف الانانية ديه الواحد بيتولد بيها
بس مفروض بقة الاهل يهتمو فى التربية
انهم يحولو يقللو موضوع الانانية عشان صعب جدا تتلغى
يعنى ميقلوش متديش حد من سندوتشاتك فى المدرسة والكلام ده
ولو قلولو ادى لصحابك لازم يعرفوه ليه بالظبط و ان ديه حاجة كويسة
وانك لما تدى للناس الناس الناس هتديك بس فى نفس الوقت
مستسناش حاجة من حد ديما استنى جزاء ربنا
بجد بجد بجد لو موضع الانانية ده اتعالج من الطفولة الدنيا ديه هتبقة
حاجة تانية خالص
لو حد سمعنى ياريت يفكر فى الموضوع ده
ولو هوه فى موقع يقدر ينفذ الكلام ده (وهوه مقتنع بالكلام ده يعنى) ياريت يحاول ينفذه
او يقدر ينقله لحد يعرفه اى حاجة
عشان فى ناس بجد بتبقة اصلا انانية فى تربيتها لاولدها
بيبقو حطين اولادهم فى المرتبة الاولى وبعدين كل الدنيا بعديهم
يمكن كلامى مش جديد على ناس وجديد على ناس مش عارف
بس انا حبيت اقول حاجة فكرت فيها وحسيت انها مهمه وعاوز اقولها
(اللهم بلغت اللهم فشهد)

بجد مش عارف

السلام عليكم ورحمة الله وبركاته

فى الاول عاوز اقول انى اسف انى اختفيت الفترة اللى فاتت ديه
بس بجد مرييت بفترة سخيفة جدا ولحد دلوقتى بحاول اطلع منها
اللى حصل ايه بقة
صلو على النبى الاول........(عليه الصلاة والسلام)
تمام كده
اولاً: تعمل ايه لو لقيت نفسك شخصيتك بتتحول للاسوء وانت مش عارف ليه
عشان تعرف توقف ده .... وكان الواحد نازل على منحدر ومش عارف يفرمل
وممكن لو فرمل هيقع برده !!!

ثانياً: تعمل ايه لو لقيت ان فيه تضاد بين احلامك والمبادىء اللى انت طول عمر عايش بيها
ومش مجرد حلم بسيط ده حلم عمرك وبرده المبادىء هتقلب حياتك تماماً.

ثالثاً:تعمل ايه لو لقيت نفسك عاوز تبعد عن ناس بتحبهم بدون سبب منطقى
بس جواك احساس انهم مش بيحبوك وانك مش لازم تحبهم.

رابعاً: تعمل ايه لما تلاقى نفسك بتفقد ثقتك فى نفسك (شخصيتك-قدراتك-عقلك-حتى شكلك)

خامساً:تعمل ايه لما تلاقى كل الناس اللى حوليك مش حسيين بده واللى حاسس ان فى حاجة
مش قادر تقله كل ده.

يمكن انتو مش متعودين منى على بوستات بالشكل ده
بس اعزرونى كان لازم اقول الكلام ده جايز لما اكتبو
افهم حاجة من اللى بيحصل ده.... ياريت تدعولى

سخافات تلفزيونية

السلام علكيم ورحمة الله وبركاته

وانا ماشى من كام يوم كده خطر فى بالى موضوع غريب مش عارف ليه انا فكرت فى اساسا
بس لقيته منطقى اوى موضوع "الكاميرا الخفية" اكيد كلنا شفنا قبل كده برامج المقالب ديه
اللى المفروض ان الكاميرا بتكون فيها مخفية وانا بتكلم خصوصا على اللى المقلب بيتعمل فيها على ناس مش مشهورة
لقيت ان فكرة الكاميرا الخفية ديه فى منتها الغرابة ... اقلك ازاى....
الفكرة ان ناس بتعمل مقلب فى ناس متعرفهمش وبيورو ده لناس ميعرفهمش
يعنى تخيل كده لو انت ماشى فى الشارع وواحد متعرفهوش عمل فيك مقلب وقلك انا كنت عامل فيك مقلب
وصورتو على الموبايل وهبعتو لكل الناس على البلوتوث
اكيد هتتخانق معاه هوه يعرفك منين اصلا عشان يعمل فيك مقلب ويشردلك كده
هوه ده بالظبط اللى بيحصل فى الكاميرا الخفية ناس اغراب بيعملو مقالب فى بعض ... فين المنطقية هنا ؟؟
سيبكو من ان اصلا البرامج ديه اغلبها لو مش كلها تمثيل يعنى وبتلاقى قمة الاستخفاف بعقل المشاهد فيها.

وبمناسبة بقة الاستخفاف بعقلية المشاهد بتلاقى حجات كتير فى التلفزيون متعرفش هيه موجهة لعقلية مين بالظبط
هل للاطفال ام الكبار ام اصحاب القصور الذهنى
يعنى تلاقى معظم الافلام هيه نفس التيمة
1- البطل الذى لا يقهر بيضرب كل الشريرين الوحشين بيديه العاريتين وقدماه ناس قد الباب مجهزين
باحدث الاسلحة وفى الاخر ينقذ البنوتة او يرجع الميكروفيلم للمخبرات
2-قصة الحب العتيقة هوه بيحبها وهيه بتحبه لكل هوه فقير وهيه غنية او العكس ويستمر الصراع وفى الاخر يتجوزو... طيب
3-(ديه بقة للمغنين) الولد صوته حلو ومهوب بس مش لاقى فرصة لحد ميلاقى منتج حاطط صباع كفتة فى بقة ويقله انت هتبقة نجم مصر
وفعلا وفى الاخر يحب السكرتيرة بتاعة المنتج او اى وحدة حلوة وخلاص مش هنختلف
4-افلام العيد اللى بتلاقى واحد مقتنع ان دمه خفيف فبيعمل فيلم ملهوش اى قصة او حبكة اهم حجاة يبقة فيه ايفهات وضحك

وبمنسبة الافلام بقة طلعت موضة اسمها
exclusive
تلاقى الفيلم معروض على 34 قناة فى نفس الوقت ويقلك exclusive طب ازاى !!

وطبعا مش هقدر انسى الاعلانات الجميلة اللى بنشفها وخصوصا فى رمضان
واخص بالذكر اعلان شيبس Fox بتاع احمد التهامى لحد دلوقتى مش فاهم هوه الاعلان عاوز ايه
وهوه ليه بيزق الكشك !!! لو حد عارف ياريت ينورنى
كفاية كده بقة انا تعبت

هتوحشنى

السلام عليكم ورحمة الله وبركاته

عيد سعيد عليكو كلكو
النهاردة اول يوم فى عيد ا لفطر
ومن 30 يوم اول مرة افطر الصبح مش المغرب
شعور غريب اوى حاسس انى مش مفروض افطر
وفى ناس كتير بتحس كده برده
بس الغريب بقة انى قبل رمضان ميخلص بيوم او يومين
كنت بقول الواحد اخيرا هيعرف يشرب مية براحتة بقة
وديه من اهم الحجات اللى فى الدنيا
وبعد مخلص رمضان
مش عارف ليه حسيت انى مدايق شوية
زى مكون كنت فى حلم جميل وصحيت منه
الشهر الجميل ده عده بسرعة جدا ملحقتش اشبع منه
فى خلال ا لشهر ده الواحد كانت حالته النفسية مستقرة الحمد لله
وبمجرد مخلص الواحد حس برتباك شوية كده
واعتقد ان رمضان كان هوه اللى عامل الموازن ديه للواحد كده
وكانت الشياطبن محبوسة بقة ومفيش حد يلعب فى دماغ الواحد
بس على اد مهيوحشنى رمضان على اد مهحاول استمر فى الحجات
الجميلة اللى اتعلمتها فيه لحد ميجى تانى واتعلم حجات اكتر
بجد هتوحشنى اوى ..... هستناك....يارب ارزقنى انى اعيش لحد رمضان الجى

رسالة

السلام عليكم ورحمة الله وبركاته

ازيكو كلكو؟؟
(يمكن البوست ده هيبقة طويل شوية بس عشان خاطرى استحملونى عشان الموضوع يستاهل)
امبارح كان من اجمل الايام اللى عدت عليه بجد
جربت حاجة عمرى معملتها قبل كده بجد
كنت ديما بكسل ومكنتش فاكر انها هتبقة كده خالص
هنبتدى من الاول
كتير مننا عرفين دار رسالة (بتيجى اعلانتها فى التلفزيون حتى)
وللى مش عارفنها هيه دار للايتام بس كبيرة جدا على مستوى جميع محفظات مصر
وليها انشطة كتير مش مجرد للايتام بس
فمن فترة كده لقيت اختى بتقلى ان فى حاجة اسمها قافلة تبع (رسالة) بتروح توزع
شنط فيها مواد غذائية للناس المحتاجه
قلتلها ماشى ربنا يوفقك
قلتلى طب متيجى معايا وكده
قلتلها ان شاء الله (وانا مش متحمس للموضوع)
وراحت اقنعت اخويا وكده واقتنع
بس لما جم يروحو انا كسلت وقلت انام احسن ده احنا فى صيام ياعم
مش طلبة بهدلة فى الشمس ديه
ده انا بعطش وانا قاعد فى البيت
المهم راحو هما ولما رجعو قلولى انهم اتبسطو وكده وحكولى على اللى حصل معاهم وكده
وبعدين طلع ان فى قافلة تانية فجيه اخويا قلى قبلها بيوم ده فيه قافلة وكده متيجى قلت ربنا يسهل
ومحطتش فى دماغى بس قبل القفلة متطلع بكام ساعة جيه قلى هاه جى ولا لا
وسبحان الله ه فجاة كده راح الكسل منى وقلتلتو ماشى
وقد كان
رحنا ولما دخلنا مقر الجمعية لقينا شوية شباب عملين يحملو الشنط على العربية
عملين زى طابور كده وكل واحد بيدى للجمبو لحد متوص الشنط للعربية
المهم وقفت انا واخويا فى الطبور وكان الموضوع لزيز يعنى قلت حلو الموضوع مش متعب اوى يعنى
بعد مخلصنا تحميل الشنط طلعنا بالاتوبيس على (الفيوم) اللى مفروض هنوزع فيها الحجات ديه
بعد موصلنا الفيوم قسمونا فى مجموعات عشان كل مجموعة تروح قرية وكل مجموعة ليها (قائد)
المهم رحنا قرية كده شكلها غير اللى بيجبوها فى التلفزيون والمسلسلات ( فرن وحمام وبط وبتاع)
لا ده فى بيوت فيها مفهاش غير حصيرة (هذا ان وجدت)
بجد حمدت ربنا على النعمة اللى انا وغيرى كتير فيها
فضلنا نلف فى القرية نوزع الحاجة وكان معظم اللى بندلهم الحاجة ناس مسنيين
واللى كان غريب فى الجروب اللى انا كنت فيه كان فيه معانا بنت صغيره
فى ابتدائى كده طالعة لوحدها!! تخيلو وكانت مصرة تشيل الشنطة
وتكون اخر واحدة تدى الشنطة بتعتها مع ان الموضوع متعب عشان هيه هتفضل
تلف بالشطنة كل ده
المهم الحر كان فعلا شديد والترب كتير والدبان سخيف ومينفعش طبعا نشرب ميه
بس الواحد بيستحمل عشان بيعمل حاجة مفيدة
المهم بعد مخلصنا كان فاضل اكتر من ساعتين على الفطاركان بجد سعتين
صعبين جدا شعور بالعطش مش معقول ابدا حسيت ان كل السوائل اللى فى جسمى خلصت
المهم ر حنا ريحنا فى المسجد شوية الواحد غسل دماغو كده وريحلو شوية قبل الفطار
ايوه مهوه احنا مروحناش بقة عشان كانو عملين فطار جماعى للمسنين
كان فيه ناس هيه اللى بتعمل الاكل وناس بتستقبل المسنيين وناس بتوضب الترابيزات
وناس بتنزل الاكل وناس واقفة على الترابيزات تشوف لو حد محتاج حاجة
فضلنا نعمل كل الحجات ديه ونفطر الناس منغير محنا نفطر احنا يدوب شربنا ميه
وديه كانت كفاية جدا جدا جدا
وبعد مخلصنا ابتده الشباب يفطر بقة وفى مننا مفطروش عشان هما خلاص شبعو
لما شافو الناس ديه فطرت بجد
وده مش كلام اغانى ولا حاجة انا لحد مروحت كنت شبعان ومفطرتش لحد مجه السحور
بجد كان شعور ميتوصفش لما تساعد حد محاتج الواحد حس شعور غريب
بعد مخلص كل ده
شعور العطاء ده ملهوش مثيل بجد لازم كلكو تجربوه
مش كفاية بس انك تدى واحد حسنة فى ايده و خلاص
انك تتعب عشان تريح غيرك ديه حاجة مختلفة خالص شعور مش شبه اى شعور تانى
نفسى كل الناس تجربه ... كل واحد فينا بيجرب حجات جديده كل شوية ديه حاجة فى الانسان
طب ليه متجربش ده ولو لمرة واحدة صدقنى هتلاقى نفسك عاوز تجربها تانى تالت وعاشر
بجد اللى شفته امبارح حسسنى كمان ان لسه فى شباب جوه خير كبير
وشباب عادى جدا مش متدينين اوى ولا حاجة يعنى
بجد بدعوكو كلو انكم تجربو التجربة ديه
يلا عشان تلحقو قبل ميخلص رمضان عشان الثواب بيبقة مضاعف فى رمضان
ومحدش يكسل عشان هيفوته كتير اوى

لو بطلنا نحلم.....

اولا بعتذر عشان مش بخش كتير الايام ديه بس ان شاء الله هحاول على قد مقدر احط بوستات جديدة كل شوية ... ادعولى

نخش فى الموضوع بقة
عارفين طبعا ان الانسان ميقدرش يعيش من غير حلم والكلام ده
وانا مقتنع بده تماماً
بس فى فكر منتشر دلوقتى واللى هوه متحلمش عشان لو حلمك متحققش
متزعلش ومتتدمرش
اللى موافق على الموضوع ده يرفع ايده
كل دوول ناس رفعت ايديها !!!
طيب ... انا عن نفسى مش شايف كده
اصلا التفكير فى الحلم والتفائل انه ممكن الحلم يتحقق ده جزء من التجربه
يعنى لو واحد بيحلم انه يبقة عنده مليون جنيه وجتله فرصة انه ممكن يبقة عنده مليون جنيه لو اشتغل حاجة معينه بس الفرصة مش اكيدة يعنى ...يعنى ممكن اه وممكن لا...
النوع الاول من الناس يقلك ايه : لا ياعم انا افكر انها عمرها مهتحصل عشان او محصلتش ابقة كده مزعلتش على حاجة بدل محلم وكل احلامى متتحققش
النوع التانى بقة بيقول : لا انا ابقة متفائل عشان اشتغل احسن بدل مبقة محبط وممكن من الاحباط ده الحاجة متحصلش
انا مش هقول ان ده صح وده غلط
بس انا شايف ان الحلم فى حد ذاته متعة حتى لو متحققش
فليه نحرم نفسنا منها ( طبعا بعيدا عن احلام اليقظة والاحلام الوهمية اللى ملهاش اساسا)
يعنى مينفعش احلم انى ابقة غنى وانا قاعد فى البيت كده
بس ارجوكو اوعه حد يبطل يحلم عشان خايف يفشل
عشان احنا فى مصر دولقتى شعب من غير حلم ... محدش عاوز يحلم.... طب عيشين ليه ؟؟؟

البحث عن ر مضان !!!

كل سنة وانتو طيبين اولاً

ورمضان كريم ثانياً

ثالثا بقة وده الاهم هوه رمضان فين ؟؟

مش عارف ليه الواحد ليه مش حاسس برمضان زى الاول 

حتى ريحة رمضان مبقتش موجودة...ايوة رمضان ليه ريحة كده مميزة

بتبتدى تظهر قبل رمضان بيوم او يومين

وبتبان اكتر حاجة قبل الفطار او وانت رايح تصلى فى المسجد

بس رمضان ده مشمتش حاجة ( مع انى معنديش  انفلونزا يعنى)

سيبكو من الريحة حتى التلفزيون بقة سخيف غير الاول كان بيحسسك بالجو كده

بس دلوقتى مسلسلات نكد كده وعياط ( مش عارف ايه دخل ده برمضان)

يعنى بصراحة لولا الصيام وصلات الترويح الواحد مش هيحس بان رمضان

جيه اساساً

بس الحاجة الوحيدة اللى بشوف فيها  جو رمضان الناس لما بتقلك كل سنة وانت طيب

من قلبها كده (مش اللى بيقلوها واجب)

يعنى لما سواق تاكسى يقلهالك وهوه مبتسم كده ( وديه مبتحصلش غير  فى رمضان تقريبا)

فى العيد  بيقلهالك (بس وهوه عاوز  فلوس اكتر)

وجو رمضان بيبان برده بيبان كمان لما الواحد بيشوف ناس اكتر فى المسجد

وخصوصاً صلاة الفجر

حجات كده بسيطة بس بجد بتحسس الواحد  بروح رمضان

مش عارف اذا كان ده شعورى انا بس ولا فيه ناس  حاسه كده برده

بس انا هفضل على امل ان رمضان ده  او حتى اللى جى

يببقة احسن واحس فيه الشعور اللى كنت بحسه وانا صغير

ان رمضان هوه العيد الحقيقى مش عيد الفطر

كل التجان مع بعض بقة (بسعر الجملة)

بصراحة انا اتكوم عليه كمية تيجان غريبة

فقررت انى اعملها مرة واحدة عشان اعمل بالمثل اللى بيقول

لا تؤجل  عمل اليوم اللى الغد وانا اجلته كتير اوى

وبما ان فى تيجان مكررة هكتفى انى اكتب اسم المدونين اللى بعتوها

(اكيد مش هحلها مرتين)

يلا بينا

.........................

اول حاجة كده كان جالى تاج من المدونة نورة الخشة صاحبة مدونة اه وكفى

بس للاسف المدونة دلوقتى مقفولة ومش عارف اخد منها التاج

وتاج من اسماء الشيخ

صاحبة مدونة كلام وخلاص

بس ده انا عملته قبل كده

اما بقة التاج ده جالى من اتنين

من  نعكشة صاحبة مدونة نعكشة

( اللى بقلها فترة كبيرة مختفية ان شاء الله تكون بخير)

ومن كيارا صاحبة مدونة ضى القمر

 والتاجين شبه بعض بس بتاع نعكشة كان  فيه اسئلة زيادة

فنحل ابو اسئلة زيادة وبكده بقة حلينا 2 مع بعض

( هيه ديه السهولة فى الاداء )

والتاج اهوه

بدأت تدون من امتي ؟ و دخلت العالم ده ازاي ؟

انا ابتديت تدوين  فى شهر يوليو اللى فات ده يعنى مش من كتير 

ودخلت عالم التدوين بتشجع من اختى المدونة فانيلا صاحبة مدونة فانيليا بالشكولاته

ايه كان انطباعك في البداية ؟

فى الاول كنت تايه شوية كده ومكنش فاهم ايه اللى بيحصل بس لما ابتديت اقرأ البوستات بتاعة الناس

وارد عليها وافهم الناس بتفكر ازاى لقيت الموضع لزيز خالص

مين أكتر واحد بتهتم بتعليقه علي بوستك الجديد ؟

بجد انا بهتم باى حد انه يرد على البوست حتى لو اول مرة يخش المدونة

بس اللى بهتم بيهم اكتر  حاجة اللى حاطت مدوناتهم عندى فى المدونة

مين اتعرفت عليه من خلال المدونة و نفسك تتعرف عليه في الحقيقة ؟

انا لحد دولقتى متعرفتش على حد بصورة كبيرة للدرجادى بس 

لو اتيحت ليه الفرصة انى اتعرف على اى حد من المدونين اللى بينورنى على 

طول هكون سعيد جدا

ايه أهم حاجة اتعلمتها من عالم التدوين ؟

مش حاجة معينة بس بشوف انواع من طرق الكتابة المختلفة

وشخصيات مختلفة وثقافات مختلفة واكيد ده بيضفلى كتيير

ايه أكتر حاجة كرهتها ؟

مفيش حاجة وصلت لدرجة الكره بس فى مدونات كلها كآبة  وفى نفس الوقت مفهاش اى فن

وفى كمان مدونات تلاقى واحدة بتحب على نفسها طول المدونة او واحد برده نفس الكلام 

ممكن تدي مثال عن اللي بتحلم تلاقيه ؟

بحلم مصر ترجع زى الاول و الناس ماشيه فرحانه كده

حاسس ان التدوين له تأثير ؟

مفيش حاجة  ملهاش تأثير

بس فى حاجة بيبقى ليها تأثير قوى وفى حاجة بيبقى ليها تأثير ضعيف

وانا شايف ان المدونات ليها تأثيربس بين المدونيين وبعض يعنى تأثيرها محدود

طيب كلمة أخيرة ؟

مفيش حاجة حاجة عاوز اقلها

بس عاوز اقلكو كل سنة وانتو طيبين رمضان قرب خالص

أوجه التاج لـ

Appyplanet

L0vElYGh0sT14

دعونا نلعب فى صمت

كلام من القلب

اه وكفى

fokaak meny

أيام وعيشنه

زى الهوااااااااااااااا

Un!Quε G!яL

انا وهى

فانيليا بالشوكولاته

 zanooba (zeinab sab9n)

 original heart

 blue-wave

 shimaamahdy

 ftafeet

 واد غلبان 

 ندا منير

 بذرة امل 

تحديث: فى تاج كمان من  zanooba (zeinab sab9n)

كانت بعتتهولى من فترة والتاج اهوه:

1-أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟

هوه الواحد احلامه زمان كان غير دلوقتى كانت احلام فيها نوع من السذاجة حبة 

يعنى كان بيحلم بحاجت مش على اد امكنياته اصلا

( وبصراحة السؤال ده ملعبك فى بعضه مش فاهم اذا كان عاوز

 احلام كنت بحلمها زمان ولا  حجات حصلتلى زمان وعاوز اغيرها)

لو احلام كنت بحلمها زمان اقلك:

1- كنت بحلم وانا صغير ابقة زى العقاد ومكملش تعليمى وابقة اديب كبير 

(اصلى مكنتش بحب الدراسة خالص)

2-كنت بحلم اخش اعلام 

( بس للاسف كلية اعلام دلوقتى بطلع مذيعات اكتر مبطلع اعلاميين)

3- وانا صغير كان نفسى ابقة جندى واحارب واحرر فلسيطن او ادافع عن بلدى 

( بس واضح ان ده مش زمن حرب احنا فى زمن السلام)

ديه الاحلام اللى فاكرها اصل الذاكرة ضعيفة

اما بقة بالنسبة للجزء بتاع حاجة اعدلها فى الماضى

 انا مش عاوز اعدل حاجة فى الماضى عشان كل حاجة حصلت فى الماضى كان نتيجتها 

انى شخصيتى الحالية دلوقتى موجدة وانا راضى عن شخصيتى بعيوبها وبمميزتها

2-أذكر 5 أحلام على الأقل تخص مستقبلك ؟

1-بحلم اشتغل حاجة بحبها

 مصور فوتغرافى فى شركة اعلانات 

او افتح شركة دعاياة واعلان 

او ابقة مخرج سينمائى

 حجات كتير اوى

2-بحلم اعيش حياة سعيدة من غير مضر حد او حد يضرنى

3- بحلم اعيش مستور

4 - بحلم اللقى صحاب افضل معاهم لحد ماموت

5- يارب اخش الجنة

3-أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟

انا مؤمن بان كل واحد بيجى فى الوقت المناسب لييه 

يعنى ممكن لو جه فى وقت قبل كده مش هيبقة مفيد (نظرية برده)

4-أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟

ممكن ( جدى) عشان ملحقتش اعرفو وانا صغير بس بجد كان نفسى اعرفو اكتر من اللى اتحاكلى عليه

وجدى التانى برده ( ابو بابايا) برده كان نفسى اتعرف عليه عشان ملحقتش اعرفه خالص

5-لمن تهدي هذا التاج ؟

لكل الناس اللى ادتهلهم فى التاج اللى فات ده

بالاضافة الى :

كيارا

أنا اسف

تخيل معايا كده واحد ماشى فى الشارع بالعربية وكسر على عربية تانية فجاة...

بس الحمد لله حصل خير .... طبيعى ان اللى دخل غلط ده هيعتذر والتانى يقله ابقة خلى بالك 

ويمثل انه متنرفز وبعيدن يقول حصل خير ويمشى

بس مش هوه ده اللى بيحصل

خلينا نعيد المشهد اللى بيحصل

.

.

.

واحد ماشى بعربيته وكسر على عربية تانية... وحصل خير وكل الكلام الحلو ده

الراجل اللى غلطان بقة مش بيعتذر (ايه يعتذر ديه لسه متخلقش اللى يعتذرله)

الجملة السخيفة ديه بيقلها ناس كتير مش فاهم ليه

وكإن الاعتذار ده عيب يعنى

مماته قلتله وهوه صغنطط متلعبش مع العيال  الوحشة ولو حد قلك هديك شوكلاته مترحش معاه

واوعه تعتذر ياحمادة الناس تاكل وشنا

او مثلا مرة اعتذر لحد صاحبه فى المدرسة راح المدرس طلعه بره ومده على رجله وزنبه على الحيط

بجد مش عارف جابو ثقافة عدم الاعتذار ديه منين ؟؟

سيبكو من موقف العربية ده مش هوه ده الموقف الوحيد انا بقول على سبيل المثال وليس الحصر

يعنى لو واحد اتنرفز وغلط فى حد مثلا

فبعد ميهدى الطبيعى انه يعتذر

لا

ازاى ميصحش

يروح قايل ايه: ده هوه اللى نرفزنى يبقة يستحمل بقة.

حاجت كده مبشفهاش صراحة غير فى مصر والشرق الاوسط للاسف

بره فى الدول المحترمة لاحظت ان عندهم ثقافة لاعتذار موجدة بشكل اكبر من عندنا

وتلاقى الواحد بيعتذر وتحس انه ندمان كده على اللى عمله

هنا حتى لما بيعتذر

يقلك (معلش) والكلمة ديه بتدايق اصلا اكتر من الفعل اللى انت بتعتذر عشانه

معلش ديه مفروض تتقال لما تكون بتهون على واحد بيشكيلك حاجة 

بس انا مش مقتنع بيها كاعتذار خالص 

ولو لقه اللى قدامه لسه زعلان برده

يقله: مقلنا معلش هيه شغلانه.

حجات كده يعنى

اللى عاوز اوصله فى النهاية

انه طالما الواحد غلطان لازم يعتذر مهما كان كبير فى السن او المقام

ومش عيب لما الواحد يقول انا اسف 

مش هتقلل منه ولا من هيبته قدام يعنى

وياما علاقات اتقطعت عشان مفيش حد عاوز يقول انا اسف

او مكسوف يقولها وكانها كلمة قبيحة يعنى

متقول ياعم وابقة استغفر ربنا بعدها متزعلش نفسك

بس قلها.

فيلم الصيف (مش فى دور العرض )

انا قلتلكوا قبل كده انى بخرج افلاص قصيرة ..صح

المهم... ادينى بقول اهوه عشان محدش يقول محدش قلى

قلت احط الفيلم عشان الحق موسم الصيف قبل ميخلص بقة و عشان اعرف رايكو برودو

وان شاء الله يعجبكوا ويجيب اعلى ايرادات كده

الفيلم اسمه (سيف يد ) اسمه غريب انا عارف

بس لما تشوفو هتفهمو

هوه فيلم كوميدى ( ان شاء الله )

بصو مش هضحك عليكو واقول انه جامد اوى

بس هوه اخراجياَ حلو عشان انا اللى مخرجو

والقصة عملنها مع بعض فى نفس اليوم كده

هوه الفيلم خد يوم واحد تصوير وقصة وكل حاجة

والمونتاج خد بتاع يوم او يومين لحد مخلص خالص

اخوبا هوه المونتيرالجماد بتاع الافلام اللى شركتنا بتعملها

شركة 

a7

للانتاج الفنى

شركة صغيرة كده

فتحنها فى البيت كده على الضيق

المهم

واللى ممثلين فى الفيلم

صحابى على اصحاب صحابى

تركيبة غريبة بس كويس جدا انه

طلع كده 

وعلى  فكرة انا عامل افلام تانية احسن من كد بكتير

بس مقدمها فى مهرجان القاهرة لافلام الموبايل

فلما يخلص هبقة ارفعها بقة

وافرجكو على الشغل الجامد

يله عاوز الكل يخش الفيلم ويقول رأيه

مستنيكووووووووووووووو

>>>>seef yad<<<<

عيشوها...

مش عارف انا ليه الايام ديه بقيت اعمل بوستات كده

بس كل مبفكر فى حاجة وبتشغل دماغى بحب اشاركها معاكو

واعرف رأيكو بردو...المهم...

فى ناس كتير تلقيها تقلك الحياة ديه زفت والناس ديه كلها وحشين

مفيش حد بقة يحب حد وكله بيكدب على بعض وكل بيخون بعض

ولما تيجى تشوفو اصلن ايه اللى مر بيه فى حياته تلاقى

انه مر بتجربة او 2 او حتى 5 وحشين

فيروح معمم ان كل الناس وحشة

طب ياعم ديه مصر لوحدها اكتر من 70 مليون لحقت تعرفهم كلهم

وعرفت ان كلهم وحشين  وخاينيين!!

المشكلة لما الواحد بيمر بتجربة سلبية بيبقة شايف انه شاف اللى مشفهوش حد

وانه انجرح جرح محدش انجرحه قبله ولا بعده

وفى الحقيقة انه اكيد فى ناس اتبهدلت اكتر منه بكتير

بس مش معنى كده انى بتفه من الموقف اللى مر بيه

اكيد كل انسان لما بيمر بموقف صعب بيأثر فيه جامد

بس ده مش معنى انه يقرر ان الحياة وحشة والناس وحووش

مش هقول ان الحياة حلوة 100% والناس ملايكة

بس كل واحد فينا جواه الحلو والوحش

مفروض كل واحد يدور على الحجات اللى الحلوة اللى جوه الناس

ميفضلش يدور على العيوب عشان عمرنا مهنلاقى انسان كامل ( الكمال لله وحده)

وزى مفى الناس حجات وحشة برده احنا فينا حجات وحشة والناس بتستحملنا برده بعيوبنا ديه 

يعنى كل الناس تقلك انا مكرهش اد الكذب واصلاً مفيش حد فينا مبيكدبش

ومتقليش انا بكدب كدب ابييض وكدب اخضر الكذب كذب ( طبعا فى انواع من الكذب مش محرمة فى الشرع ملناش دعوة بيها دلوقتى)

بس محدش يقنعنى انه مكدبش عمره وممكن الكدبة اللى انت فاكرها كدبة بيضة ديه تضر حد وانت مش عارف

عشان الكدب مش محرم من فراغ

اللى انا عاوز اوصله ان اللى جواه حلوة بيشوف الحلو اللى جوه الناس

وهوه ده اللى بيعرف يتعامل معاهم عشان بيركز على الحجات الحلوة

وبيعرف يستفيد منها ويسمتع بيها

والحياة عاملة زى الفيلم السينمائى فى ناس بتفرج على الفيلم يعجبها جدا وتبقة مبسوطة (عشان شافت الحلو فيه)

وناس تلطع تشتم فيه وتفضل متنكده عشان شافت الفيلم ده ( عشان شاف الوحش بس)

وفى ناس بتلطع مش فاهمه الفيلم اساساً فبتروح قايله ده وحش ( طب عرفت منين اذا كنت مفهمتهوش اصلا)

مع العلم ان مفيش فيلم وحش 100% يعنى لو فيه 10% بس اللى حلو ....نقدر نستمتع بالشوية دول يعنى

فعشان خاطرى استمستعوا بكل لحظة عايشينها

وعلى راى اعلانات فودافون 

"عيش احلى ما فى  اللحظة"

غباء فى ذكاء ( ومحدش فاهم حاجة )

بصو بقة فى موضوع عجيب ( على اساس ان المواضيع التانية مش عاجيبة)

المهم الموضوع عن الذكاء والغباء 

انا لاحظت ان الذكاء والغباء للاسف ملهاش معايير

ايوة ملهاش معايير سيبكوا من اختبرات الذكاء ديه

ديه انا باعتبرها اختبرات غباء مع احترامى للعلماء اللى عملوها

يعنى كان فى علم النفس فى الثانوية  الاستاذ كان جابلنا اختبار ذكاء

بتاع عالم ماشهور كده المهم يعنى طلع عارفين حاجة زى اسئلة قناة استريك ومزيكا كده

حاجة تشل ملهاش علاقة بالذكاء والغباء

غير كده كان فى اختبار شوفتوا على النت بيقلك بيل جيتس جاب فى 4 نقاط بس

وانا جبت 4 بردو تقريبا ... معنا كده انى هبقة اغنى حد فى العالم!!

 غير كده

فى ناس جابت اعلى من اربعة وهيه ناس عادية يعنى مش عباقرة

الهم نسبنا من حوار الاختبارت ده الموضوع اللى معقدنى بقة انى

لاحظت ان فى ناس بتبص لناس على انهم اغبية مع انهم اكتر منهم فى الذكاء ( متنسوش انى ديه وجهة ناظرى انهم اكنر منهم فى الذكاء)

مش بقلكم موضوع معقد ...

وفى ناس بتبص على ناس على انهم عباقرة  وهما مش كده خالص (ده برده وجهة ناظرى)

مين بقة يقدر يحدد فعلن الذكى من الغبى

هتقولوا اذكى واحد طبعا

طيب مين هيحدد اذكى واحد اصلن مش ممكن يكون هوه غبى واحنا مجرد اغبى منه

مش ممكن يكون كل الناس اغبية بس بدرجات 

هوه موضوع  معقد مش عارف انا علمتو ليه اصلا بس بجد هوه معقدنى فقلت لازم تشركونى المرح 

واخير ممكن ناس تفتكر ان الكلام ال انا  قلتو ده اغبى كلام ممكن يتقال وممكن ناس تفتكر العكس

دماغى هتفرقع ....

بجد مش قادر اكمل عشان الموضوع ميتعقدش اكتر من كده

سلام بقة

جالى تاج يا ولاد

فى الاول احب اشكر الزميلة المدونة

miada ref3at

على التاج الجميل ده

اى نعم هوه مش على مقاسى قوى

بس مشكلة اى ترزى هيعرف يزبطة

 

تانى حاجة

موضوع التاج ده  لسه واخد بالى منه وانا بشوف المدونات

وكان نفسى اعرف مين اول واحد طلع بالفكرة ديه

(لو حد يعرف يقلى )

وقلت كمان فى بالى التاج ده للناس المعدية اللى بقلها كتير فى عالم التدوين

انا لسه بدرى عليه لما اخد تاج او حتى كاب

ببص النهاردة لقيت التاج مبعتلى

فرحت بس فى نفس الوقت حاسيت انى اتدبست

بس الحلو فى الموضع ان معظم الاسئلة ديه اتسئلتها قبل كده

فهيسهل الموضوع علية

بينى وبينكوا انا اتهريت اسئلة

وانا بعشق حاجة اسمها اسئلة

وبموت فى حاجة اسمها حرف استفهام

المهم...

ادينى هجاوب اهوه وربنا معنا بقة

 

أعطيتك ثلاث وردات .. من هم الثلاث أشخاص اللى هتعطيهم الورد اللى معاك..؟

-الاولى: هديها لبابا

والتانية : ماما

والتالتة : مش للاخوة والاقارب لا

التالتة هشيلها لشخص لسه مقبلتهوش ولا عرفتو

بس انا عارف ان مكتوبلى اقبله واعرفه

فى يوم من الايام... وسعاته هيبقة احق حد بيها

(ادعولى اقبلها)

لو أعطيتك ورقه فيها 3 سطور وقلتلك اكتب فيها اللى انت عاوزه هتكتب ايه..؟

-مش عارف ايه البخل ده ليه مش ورقة فلوسكاب

او ورقة من نص الكشكول حتى

ما علينا

لو 3 بس

مش عارف بجد هكتب ايه

بس ممكن اكتب فيها وصيتى

هكتب:

لكل حد زعل منى فى يوم : انا اسف

لكل حد حبيته: انا بحبك

لكل الناس : حبو بعض عشان تعرفوا تعيشو

 

المقولة" إن شاء الله بكرة هيكون أحسن من النهاردة" هل تصدق هذه المقوله ولماذا؟؟

-بكرة ديه مفتوحة اوى ممكن يبقة بكرة القريب وممكن بكرة البعيد شوية كمان كام سنة

وممكن بكرة بقة البعيد اوى بتاع الاجيال القادمة

بالنسبة لبكرة القريب اتمنى يكون احسن بالنسبالى

بس بالنسبة لمصر عام اتمنى برده بس معتقدش يعنى انه هيبقة احسن كتير

بالنسبة لبكرة البعيد بقة

بالنسبالى عندى امل كبير انه هيبقة احسن بكتير

بالنسة لمصر معتقدش برده انه هيتحسن اوى

بالنسبة لبكرة البعيد اوى

اتمنى اكون فى الجنة بقة

اما بالنسبة لمصر اعتقد انها ممكن تكون احسن

ميين عارف

أجمل مقوله سمعتها فى حياتك؟

كتير مفيش حاجة معينة فى بالى دلوقتى

من المغنى اللى بتحبه أوى ؟

-بصوا بقة انا مبحبش حوار المغنى المفضل والكلام ده

فى حاجة اسمها اغنية حلوة اوغنية مش حلوة

مهو ممكن مغنى كويس بس مش كل اغانيه حلوة

وممكن مغنى مش اد كده ويطلع اغنية تحفة ميعملش غيرها فى حياته

بس عموما انا معنديش حد مجنون بيه يعنى عشان الواحد بيحب الاغنية مش

المغنى عشان انا معرفش المغنى شخصيا عشان احبه

بس ممكن فى القديم

عبد الحليم وفيروز

وفى الجديد

عمرو دياب ومحمد عدوية ولؤى

وفرقة وسط البلد

وفى الاجنبى بقة

Westlife-coldplay

و إيه أحلى أغنية بتحبها ؟؟

 - كل قت وبيقة ليه اغنية مفضل حسب الموود بتاع الوحد

بس انا بقالى فترة طويلة معلقة معايا اغنية اسمها

All The Same - Sick Puppies

غزه..تمثللك ايه فى حياتك..؟

غزة بتجسد الالم العربى

بتجسد معناة شعب

بتجسد الخيبة اللى احنا فيها

والشجاعه اللى اهل غزة فيها

 

إعطى لانتمائك لوطنك درجه من مائه

- معتقدش ان الحجات ديه فيها كام فى المية

الحب مفهوش حسابات انت يابتحب يامبتحبش

وانا بحب مصرى ونفسى ترجع احسن بلد فى الدنيا زى زمان

وان شاء الله هفضل فيها لحد ماشوفها كده

لو تزوجت وانجبنت..بنتين وولدين..هتسميهم ايه..؟

وهصرف عليهم ازاى دول طيب

ده عقبال ماجى اتجوز واخلف هيكونوا عملوا ضرايب على العيال

وعلى اساميهم يعنى كل مكان اسم ابنك طويل كل مدفعت اكتر

يعنى الاغنية بس اللى هيسموا اسامى مركبة

يعنى لو واحد اسمه عبد الرحمن

تعرف على طول انه اهله حالتهم المادية كويسة

ما علينا

ممكن اسمى الولدين

واحد عَمر و عمرو

عشان يتلخبطوا مع بعض بقة

والبنتين

واحدة نور والتانية نورة

عشان يتلخبطوا برده

عشان البيت كله يخش فى بعضه

عمرك غشيت فى امتحان وانت صغير..؟

-اه جينا بقة للاسئلة اللى مش بحبها

انا فى ابتدائى كنت من الطلبة الشطرين جدا

كنت بطلع ال 12 على الفصل

وهوه الفصل 15 واحد اصلا

بس برده واخد مركز

فمكنتش بحتاج اغش والكلام ده

وبعدين مكنتش فى مصر فمكنش الغش منتشر زى عندنا كده

 

لو أتعرض عليك رشوة كبيرة و انت فى زنقة مالية هتعمل إيه؟؟

- محصلتش قبل كده عشان كده مجربتش قوتى فى الحتة ديه قبل كده

بس المال الحرام ده بيودى النار عدل فبلاش منه حتى لو هيجى من وراه ملايين

قول 3 صفات بـ 3 كلمات بس توصف بيهم شخصيتك؟؟

- طيب - مختلف – كسلان ( ان شاء الله هغير الصفة ديه)

صفه عاوزاها فى شريك حياتك

- العقل

إيه اللى غير دراستك وشايف نفسك فيه قوي ؟

- فيه التصوير الفوتغرافى واخراج الافلام

بتحب السفر ؟؟

-اه جدا انا مش بسافر كتير بس بحب السفر جدا

طب دلوقتى حالا ايه المكان اللى نفسك تكون فيه ؟

- نفسى اروح قدام البحر عشان وحشنى جدا

تمرر التاج ده لمين ؟؟

- همرره لاختى vanilla

اللى دخلتنى هنا عالم المدونات

اول حاجة وهشوف بقة الناس اللى موصلهاش التاج بقة اودهولهم

وربنا معاهم