الخميس، 1 يناير 2009

كل سنة وانتوا طيبين

السلام عليكم ورحمة الله وبركاته

راس السنة بالنسبة لناس كتير مناسبة حلوة
من ناحية انهم بيخدوها فسحة ويخرجو وبتاع
ومن ناحية تانية انها بشرو خير
سنة جديدة وبيتمنوا انها تبقة احسن من اللى قبلها
بس انا ديما مكنتش بحب راس السنة
عشان غالباً ببقة لوحدى
زى اوقات الثانوية العامة وافضل اذاكر لوحدة بقة
بس السنة ديه قررت انى اقضى راس السنة مع اصحابى
عشان ابقة مع ناس بحبهم وكده
بس واضح ان خطتى فشلت
عشان بمجرد مدقت الساعة 12 كل واحد فينا (انا وصحابى يعنى)
بص لموبايل بتاعه ملقاش حد معبره
كان شعور وحش قوى على فكرة
مش عشان منعرفش حد او مقطعوين من شجرة
بس عارف لما تحس انك مش شخص مميز لحد على كل الكوكب
وعاوز يشاركك اللحظة ديه
شعور بالوحدة سخيف جداً
والاسوء منه انى لما طلعت الموبايل عشان اشوف حد اكلمه
لقيت انى فى السنة ديه فى ناس كتير وقعت منى
يا اما انا ضيعتهم عن قصد او هما راحوا بحكم الزمن والظروف
بس اللى اكتشفته انى على اد مكسبت ناس كتير السنة ديه
على اد مسبت ناس برده
بس الحمد لله انى عرفت ناس فى نفس الوقت مش عاوز
اسيبهم ابداً
وهما اصلا اللى انا كنت معاهم اصلا
يعنى لو كل واحد فينا كان بص للتانى ومبصش للموبايل
كان هيبقة الشعور مختلف تماما
وده الاكتشاف اللى لسه مكتشفه وانا بكتب السطور ديه
كل سنة وانتوا طيبين

الأحد، 23 نوفمبر 2008

الحب كده !!!

انا نفسى ابطل اسئل نفسى الاسئلة ديه
اللى بتقلب دماغى وبتضيع كل المفاهيم اللى عند الواحد
المهم يعنى
فى حجات كتير الواحد بيتولد بيها وحجات تانية بيكتسبها مع الوقت
والحجات اللى بنتولد بيها ديه بتبقة متشابهه جدا بين كل الناس
بس الحجات المكتسبة ديه بتختلف من مجتمع للتانى ومن ثقافة للتانية
المشكلة بقة ان فيه حجات مكتسبة بتتغير لما الحجات المكتسبة ديه
وللاسف لما فكرت فى الموضوع لقيت ان الحب حاجة من الحجات ديه
والموضوع ده ديقنى فعلا لانه هز اعتقادى فى الحب اكتر مهوه مهزوز
وهل اصلا الحب بيتولد مع الانسان ولا بيتعلمه
ولا شوية كده وشوية كده
طب لو احنا بتولد بيه هوه بيمر بحجات كتير بتغير فيه كتير جدا
عشان حتى الحب بيختلف من مجتمع للتانى
يعنى حسب التربية حسب البيئة حسب المجتمع
يعنى الحب فى الغرب غير الشرق غير الجنوب غير الشمال
بس سيبنا من بره خلينه فينا هنا
انا لاحظت حاجة ياريت اكون غلطان فيها
ان الناس بتتعلم الحب من التلفزيون و الاغانى
يعنى شوف اى واحد كده بيعبر لوحده عن حبه
هتلاقى مصطلحاته و حركاته وتصرفاته وكل حاجة
مستوحاه من الافلام و الاغانى
طبعا كتير جدا مش مقتنعين بكلامى
لانه بيهد احلام كتير بنوها بس انا بقول وجهة نظر
طب هقلكوا حاجة اثبتلكوا بيها وجهة نظرى
لو جبنا واحد و وحدة وحطناهم فى بيئة ميشفوش
فيها تلفزوين ولا حتى ناس بيحبوا بعض عشان ميقلدهمش
كل اللى هيفضل الحب الجسدى مش اكتر واللى هوة حاجة
غريزية بس موضوع الورد والدبديب والكلام ده
مش موجدود عشان ديه حاجة كده اختراعها الانسان
عشان يدارى موضوع الغريزة اللى فيه او بمعنى اصح
يزوقها
انا عارف ان فى ناس هتقول مين المعتوه ده او المعقد
كل واحد يقول اللى هوه عاوزه بس انا فصلت قلبى تماما
وشغلت عقلى لقيت الموضوع فى غاية المنطقية
يعنى عاوز كل حد يعرف انه مهما حب وطلع ونزل
هيفضل استنساخ من صنع التلفزيون
يعنى التلفزيون هوه اللى بيعلم الناس ازاى تحب
بصوا انا نفسى متاكد من كلامى ده 100% بس
انا شايفه منطقى لحد دلوقتى الى ان يثبت العكس

الخميس، 20 نوفمبر 2008

لو الحياة لعبة ليه مفهاش save ليه؟؟

كتير من الناس بتقول ان الحياة لعبة
ومع التطور مفهوم اللعبة اختلف
يعنى لوكانت الحياة لعبة كنا ببساطة عملنا save للوضع المثالى
اللى احنا عوزينه ولو حصلت حاجة وحشة نرجع نكمل من اول النقطة
اللى احنا عاوزينها...... مكنش هيبقة فيه مشاكل
لو كانت الحياة لعبة كان هيبقة المصير واحد والنهاية واحدة
لو كانت الحياة لعبة كان الواحد مش هيتحاسب لو قتل او كذب او سرق
المهم تكسب وخلاص باى طريقة
لو كانت الحياة لعبة كان الواحد مش هيفكر كتير هيحصله ايه
لو كانت الحياة لعبة كان كل اللى يموت يقدر يرجع يكمل من او وجديد
ويبتدى حياة جديدة
لو كانت الحياة لعبة مكنش هيبقة فيه حزن او غم او قرف
لو كانت الحياة لعبة كنت عملت Exit ومكملتهالش لو مش عجبانى
بس للاسف مفيش options اغير اللعبة هيه لعبة واحدة بس
لو كانت الحياة لعبة مكنتش حملتها

الخميس، 6 نوفمبر 2008

الخطايا

السلام عليكم ورحمة الله وبركاته

وانا عمال افكر كده كالعادة يعنى
فكرت فى ايه هيه اصل كل الخطايا
مهو كل حاجة وليها اصل
عرفين ايه هيه
(الانانية)
ايون اقلكو ازاى...
بس لما تصلوا على النبى ...
الانانية بتخلى الواحد بيفكر فى حاجة واحدة بس (المصلحة الذاتية)
يعنى لو بصنا لحاجة زى السرقة اللى بيسرق ده مبيفكرش فى اللى الشخص
اللى بيسرقو ده هيعمل ايه لما يسرق منه حاجته اهم حاجة يرضى نفسه وخلاص
وكذالك الكذب اللى بيكذب ده مش بيفكر غير انه ميطلعش شكله وحش او يطلع شكله احسن
او انه ميتعقبش مبيفكرش فى تأثير الكذبه ديه على غيره بيفكر بس فى تاثيرها عليه هوه
وممكن تطبقو النظرية ديه على كل حاجة وحشة الواحد بيعملها
بمعنى مختصر
(الانانية هيه اصل الخطيئة)
يعنى لو فكر كل واحد فى اللى حوليه شوية حلوين كده
زى مبيفكر فى نفسه الموضوع هيبقة احسن بكتير
ومش كفايا بس التفكير لازم يبقة فيه كمان اهتمام
بس للاسف الانانية ديه الواحد بيتولد بيها
بس مفروض بقة الاهل يهتمو فى التربية
انهم يحولو يقللو موضوع الانانية عشان صعب جدا تتلغى
يعنى ميقلوش متديش حد من سندوتشاتك فى المدرسة والكلام ده
ولو قلولو ادى لصحابك لازم يعرفوه ليه بالظبط و ان ديه حاجة كويسة
وانك لما تدى للناس الناس الناس هتديك بس فى نفس الوقت
مستسناش حاجة من حد ديما استنى جزاء ربنا
بجد بجد بجد لو موضع الانانية ده اتعالج من الطفولة الدنيا ديه هتبقة
حاجة تانية خالص
لو حد سمعنى ياريت يفكر فى الموضوع ده
ولو هوه فى موقع يقدر ينفذ الكلام ده (وهوه مقتنع بالكلام ده يعنى) ياريت يحاول ينفذه
او يقدر ينقله لحد يعرفه اى حاجة
عشان فى ناس بجد بتبقة اصلا انانية فى تربيتها لاولدها
بيبقو حطين اولادهم فى المرتبة الاولى وبعدين كل الدنيا بعديهم
يمكن كلامى مش جديد على ناس وجديد على ناس مش عارف
بس انا حبيت اقول حاجة فكرت فيها وحسيت انها مهمه وعاوز اقولها
(اللهم بلغت اللهم فشهد)

السبت، 25 أكتوبر 2008

بجد مش عارف

السلام عليكم ورحمة الله وبركاته

فى الاول عاوز اقول انى اسف انى اختفيت الفترة اللى فاتت ديه
بس بجد مرييت بفترة سخيفة جدا ولحد دلوقتى بحاول اطلع منها
اللى حصل ايه بقة
صلو على النبى الاول........(عليه الصلاة والسلام)
تمام كده
اولاً: تعمل ايه لو لقيت نفسك شخصيتك بتتحول للاسوء وانت مش عارف ليه
عشان تعرف توقف ده .... وكان الواحد نازل على منحدر ومش عارف يفرمل
وممكن لو فرمل هيقع برده !!!

ثانياً: تعمل ايه لو لقيت ان فيه تضاد بين احلامك والمبادىء اللى انت طول عمر عايش بيها
ومش مجرد حلم بسيط ده حلم عمرك وبرده المبادىء هتقلب حياتك تماماً.

ثالثاً:تعمل ايه لو لقيت نفسك عاوز تبعد عن ناس بتحبهم بدون سبب منطقى
بس جواك احساس انهم مش بيحبوك وانك مش لازم تحبهم.

رابعاً: تعمل ايه لما تلاقى نفسك بتفقد ثقتك فى نفسك (شخصيتك-قدراتك-عقلك-حتى شكلك)

خامساً:تعمل ايه لما تلاقى كل الناس اللى حوليك مش حسيين بده واللى حاسس ان فى حاجة
مش قادر تقله كل ده.

يمكن انتو مش متعودين منى على بوستات بالشكل ده
بس اعزرونى كان لازم اقول الكلام ده جايز لما اكتبو
افهم حاجة من اللى بيحصل ده.... ياريت تدعولى


الثلاثاء، 7 أكتوبر 2008

سخافات تلفزيونية

السلام علكيم ورحمة الله وبركاته

وانا ماشى من كام يوم كده خطر فى بالى موضوع غريب مش عارف ليه انا فكرت فى اساسا
بس لقيته منطقى اوى موضوع "الكاميرا الخفية" اكيد كلنا شفنا قبل كده برامج المقالب ديه
اللى المفروض ان الكاميرا بتكون فيها مخفية وانا بتكلم خصوصا على اللى المقلب بيتعمل فيها على ناس مش مشهورة
لقيت ان فكرة الكاميرا الخفية ديه فى منتها الغرابة ... اقلك ازاى....
الفكرة ان ناس بتعمل مقلب فى ناس متعرفهمش وبيورو ده لناس ميعرفهمش
يعنى تخيل كده لو انت ماشى فى الشارع وواحد متعرفهوش عمل فيك مقلب وقلك انا كنت عامل فيك مقلب
وصورتو على الموبايل وهبعتو لكل الناس على البلوتوث
اكيد هتتخانق معاه هوه يعرفك منين اصلا عشان يعمل فيك مقلب ويشردلك كده
هوه ده بالظبط اللى بيحصل فى الكاميرا الخفية ناس اغراب بيعملو مقالب فى بعض ... فين المنطقية هنا ؟؟
سيبكو من ان اصلا البرامج ديه اغلبها لو مش كلها تمثيل يعنى وبتلاقى قمة الاستخفاف بعقل المشاهد فيها.

وبمناسبة بقة الاستخفاف بعقلية المشاهد بتلاقى حجات كتير فى التلفزيون متعرفش هيه موجهة لعقلية مين بالظبط
هل للاطفال ام الكبار ام اصحاب القصور الذهنى
يعنى تلاقى معظم الافلام هيه نفس التيمة
1- البطل الذى لا يقهر بيضرب كل الشريرين الوحشين بيديه العاريتين وقدماه ناس قد الباب مجهزين
باحدث الاسلحة وفى الاخر ينقذ البنوتة او يرجع الميكروفيلم للمخبرات
2-قصة الحب العتيقة هوه بيحبها وهيه بتحبه لكل هوه فقير وهيه غنية او العكس ويستمر الصراع وفى الاخر يتجوزو... طيب
3-(ديه بقة للمغنين) الولد صوته حلو ومهوب بس مش لاقى فرصة لحد ميلاقى منتج حاطط صباع كفتة فى بقة ويقله انت هتبقة نجم مصر
وفعلا وفى الاخر يحب السكرتيرة بتاعة المنتج او اى وحدة حلوة وخلاص مش هنختلف
4-افلام العيد اللى بتلاقى واحد مقتنع ان دمه خفيف فبيعمل فيلم ملهوش اى قصة او حبكة اهم حجاة يبقة فيه ايفهات وضحك

وبمنسبة الافلام بقة طلعت موضة اسمها
exclusive
تلاقى الفيلم معروض على 34 قناة فى نفس الوقت ويقلك exclusive طب ازاى !!

وطبعا مش هقدر انسى الاعلانات الجميلة اللى بنشفها وخصوصا فى رمضان
واخص بالذكر اعلان شيبس Fox بتاع احمد التهامى لحد دلوقتى مش فاهم هوه الاعلان عاوز ايه
وهوه ليه بيزق الكشك !!! لو حد عارف ياريت ينورنى
كفاية كده بقة انا تعبت



الثلاثاء، 30 سبتمبر 2008

هتوحشنى

السلام عليكم ورحمة الله وبركاته

عيد سعيد عليكو كلكو
النهاردة اول يوم فى عيد ا لفطر
ومن 30 يوم اول مرة افطر الصبح مش المغرب
شعور غريب اوى حاسس انى مش مفروض افطر
وفى ناس كتير بتحس كده برده
بس الغريب بقة انى قبل رمضان ميخلص بيوم او يومين
كنت بقول الواحد اخيرا هيعرف يشرب مية براحتة بقة
وديه من اهم الحجات اللى فى الدنيا
وبعد مخلص رمضان
مش عارف ليه حسيت انى مدايق شوية
زى مكون كنت فى حلم جميل وصحيت منه
الشهر الجميل ده عده بسرعة جدا ملحقتش اشبع منه
فى خلال ا لشهر ده الواحد كانت حالته النفسية مستقرة الحمد لله
وبمجرد مخلص الواحد حس برتباك شوية كده
واعتقد ان رمضان كان هوه اللى عامل الموازن ديه للواحد كده
وكانت الشياطبن محبوسة بقة ومفيش حد يلعب فى دماغ الواحد
بس على اد مهيوحشنى رمضان على اد مهحاول استمر فى الحجات
الجميلة اللى اتعلمتها فيه لحد ميجى تانى واتعلم حجات اكتر
بجد هتوحشنى اوى ..... هستناك....يارب ارزقنى انى اعيش لحد رمضان الجى