الأحد، 23 نوفمبر 2008

الحب كده !!!

انا نفسى ابطل اسئل نفسى الاسئلة ديه
اللى بتقلب دماغى وبتضيع كل المفاهيم اللى عند الواحد
المهم يعنى
فى حجات كتير الواحد بيتولد بيها وحجات تانية بيكتسبها مع الوقت
والحجات اللى بنتولد بيها ديه بتبقة متشابهه جدا بين كل الناس
بس الحجات المكتسبة ديه بتختلف من مجتمع للتانى ومن ثقافة للتانية
المشكلة بقة ان فيه حجات مكتسبة بتتغير لما الحجات المكتسبة ديه
وللاسف لما فكرت فى الموضوع لقيت ان الحب حاجة من الحجات ديه
والموضوع ده ديقنى فعلا لانه هز اعتقادى فى الحب اكتر مهوه مهزوز
وهل اصلا الحب بيتولد مع الانسان ولا بيتعلمه
ولا شوية كده وشوية كده
طب لو احنا بتولد بيه هوه بيمر بحجات كتير بتغير فيه كتير جدا
عشان حتى الحب بيختلف من مجتمع للتانى
يعنى حسب التربية حسب البيئة حسب المجتمع
يعنى الحب فى الغرب غير الشرق غير الجنوب غير الشمال
بس سيبنا من بره خلينه فينا هنا
انا لاحظت حاجة ياريت اكون غلطان فيها
ان الناس بتتعلم الحب من التلفزيون و الاغانى
يعنى شوف اى واحد كده بيعبر لوحده عن حبه
هتلاقى مصطلحاته و حركاته وتصرفاته وكل حاجة
مستوحاه من الافلام و الاغانى
طبعا كتير جدا مش مقتنعين بكلامى
لانه بيهد احلام كتير بنوها بس انا بقول وجهة نظر
طب هقلكوا حاجة اثبتلكوا بيها وجهة نظرى
لو جبنا واحد و وحدة وحطناهم فى بيئة ميشفوش
فيها تلفزوين ولا حتى ناس بيحبوا بعض عشان ميقلدهمش
كل اللى هيفضل الحب الجسدى مش اكتر واللى هوة حاجة
غريزية بس موضوع الورد والدبديب والكلام ده
مش موجدود عشان ديه حاجة كده اختراعها الانسان
عشان يدارى موضوع الغريزة اللى فيه او بمعنى اصح
يزوقها
انا عارف ان فى ناس هتقول مين المعتوه ده او المعقد
كل واحد يقول اللى هوه عاوزه بس انا فصلت قلبى تماما
وشغلت عقلى لقيت الموضوع فى غاية المنطقية
يعنى عاوز كل حد يعرف انه مهما حب وطلع ونزل
هيفضل استنساخ من صنع التلفزيون
يعنى التلفزيون هوه اللى بيعلم الناس ازاى تحب
بصوا انا نفسى متاكد من كلامى ده 100% بس
انا شايفه منطقى لحد دلوقتى الى ان يثبت العكس

10 التعليقات:

Sweet Violet يقول...

طيب سؤال و عايزاك ترد عليه و بعدها ليا عود طبعا

هى الحاجات اللى فى التليفزيون او الافلام او الاغانى

من الاساس جايه منين ؟؟؟؟

seven يقول...

مهيه ديه الفكرة احنا مش عارفين جيه منين
اصلاً فمحدش عارف اذا كانت صح ولا غلط
تبع اى ثقافة بس المهم انها من حد
احنا مش عارفينه بس لحد دلوقتى بنقلده
ده باختصار يعنى

Sweet Violet يقول...

ازاى مش عارفين ؟؟؟

المؤلف اللى بيكتب الحاجات دى سواء اغنيه او فيلم او مسلسل

عايش وسطنا يعنى يوم مايكتب حاجه هايكتب من واقع الحياه مع طبعا زياده بسيطه لو كان مسلسل او فيلم

اما الاغانى فدا كلام شعراء و الشاعر عموما بيكتب اللى شايفه قدامه او اللى مر بيه

يعنى برضه واقع

يارب اكون قدرت اوصل المعنى (:

seven يقول...

بصى المؤلف اللى مؤلف الاغنية النهارده
او الفيلم وارث كل الكلام ده مش مبدعه
يعنى هتلاقى كل المعانى محصورة
انه بيحبها اكتر من الدنيا وانه عاوز
يمسك اديها
انا بتكلم على اصل الكلام ده
مش بيتولد مع الواحد
لو قريتى البةست تانى ممكن تفهينى اكتر

vanilla يقول...

.............
................
.................
..................

أنا ساكته شوية ،


مستغربة من كلامك ..



عجييييييييب ،


انت يا عم ..بتقول ايه ..

بص انت الحجات عندك داخلة فى بعضها ..فى الاول قررت ان احنا بنتعلم الحب من التلفزيون ، واستبعدت ان احنا ممكن نكون بنتولد بيه .. وبعدين خليت "شعور" الحب حكر على اتنين ولد وبنت او راجل وست .. وبعدين خليته غريزة !
أنا مش معاك خالص .. تعالى كده بالراحة ..
أنا شايفة ان الحب شعور .. والشعور محدش بعلمهولك ، أنا ممكن اعلمك بس ازاي تعبر عنه ، والتعبير ده هو اللى بيختلف من مجتمع لتاني .. انما انت بتتولد بيه زيه زي الحسد ، الخوف ، الكره ،الفرح ،عشان انت بني آدم ..

طيب نيجي لنقطة التعبير ، ودي اللى انت تقصدها أعتقد ، أنا بيتهيألي ان التعبير عن الحب بشتى الأشكال- بعيدا عن الغريزة الجسدية واللى هي جزء من الموضوع مش كله - ملهوش دعوى بالتليفزيون خالص ..طول عمرالناس بتعبر عن حبها بطريقتها من غير تلفزيون ولا حتى راديو ..يعني اللى كان عايش فى صحراء ده..وكل اللى حوليه رمل وجمال كان شاف فين أفلام عمر الشريف وفاتن حمامة ..، ولا سمع ازاي واحد بيقول حبك عامللي جنان .. ومع ذلك كتب فى حبيبته قصائد شعر طويلة عريضة الناس فضلوا يتعلموا منها لحد النهرده .. وجينا لنقطة التعلم ..

أنا معاك ان الناس متأثرة بالتلفزيون ..لأنه بقى يشكل جزء كبير من ثقافتهم .. بس متقوليش انه بيخلق الشعور عندهم ..هم بس يمكن بيتأثروا بيه فى طريقة تعبيرهم..بس فى ساعة التعبير أكيد الناس الصادقة فى حبها بيبقوا قاصدين الكلام اللى بيقولوه ، والتصرفات اللى بيعملوها .. وحاسينها ، مش بيمثلوا زي اللى فى التليفزيون .

نيجي بقى للحب كمفهوم مجرد .. أنا معرفش انت كنت تقصد الحب بشكل عام ولا لأ .. لأن الحب مش مقتصر على راجل وست .. هتقول انتي متأثرة بالتليفزيون ، وهتقولي حب بابا حب ماما على قد ما تقدر حب .. بس أنا شايفه انه مش مقتصر على شكل واحد ..يعني انت اتولدت بتحب مامتك من غير ما تشوف تليفزيون ..طب بلاش انت عشان هتقولي حب مصلحة ويمكن تفلسف الموضوع وتقولي المنفعة ومش المنفعة ..
فيه أمهات ممكن يضحوا بحياتهم عشان ولادهم يعيشوا .. و انا مش شايفة مصلحة فى كده ولا غرض عايزين يوصلوا له ..و الام بطبيعتها بتحب ابنها من غير ما حد يعلمها ..مش عايزة أفرع الموضوع .. فيه أمثلة كتير .

لو هنتكلم بقى عن الحب خصوصا بين الراجل والست .. فده حاجة محدش اخترعها .. "ربنا اللى خلقها فيهم" ..جزء منها عشان الحياة تستمر وانت تيجي وانا آجي .. بس كمان عشان البني آدم مش زي الحيوانات ..اللي هي كل اللى بيحركها الغريزة.


بس ..
يا رب يكون حتى ولو جزء من كلامي أقنعك .

seven يقول...

بصى احنا مش مختلفين فىى نقطة التعبيير
عن الحب ديه كل الناس متاثرة بالتلفزيون
وانا مقلتش ان فكرة الحب كلها متاخده من التلفزيون بس جزء كبير منه متاخده
منه يعنى المبالغة فى الحب ديه متاخده
من التلفزيون يعنى ان لما الواحد
لما يشوف فى التلفزيون ان البطل
بيسافر بلاد عشان حبيبته وبتاع
وبيضيع مستقبله عشان اللى بيحبها
فلما يكون بيحب فيقول هوه احسن منى
فى ايه بس ده طبعا فى عقله الباطن
عشان يثبت لنفسه انه بيحب بجد
ولو حتى ده مجرد حب مراهقة مش اكتر
وبالنسبة لفكرة الحب عموما
حتى حبنا لاهلنا متاثر بالتلفزيون
من اغانى الام والحجات ديه
بعيدا عن الغريزة اللى ادهلنا ربنا
التلفزيون بيزود الموضوع لدرجة
مبالغ فيها فبتقلب بغم
ونقطة الصحره الشعر زمان كان قايم
بدور التلفزوين انه بدره
بيزود الموضوع يعنى
الشاعر زمان كان يفضل يوصف فى
جمال وحده واصلا هوه عمره مشاف وشها
بس هوه من حبه فيها بيتخيل مع نافسه
وشعر زمان مليان مبالغة بالعبيط
يعنى
ده اللى حبيت اوضحه

كلام وخلاص يقول...

انا معاك جدا فى نقطة ان فيه مظاهر وطقوس بيعملها الانسان عشان يزوق الغريزة بتختلف فى تسميتها وتفاصيلها بس بتفضل هدفها واحد الحب كشعور انسانى مجرد بحت بعيد عن الجسد محتاج كتير زى انك تبقى معجون بتفاصيل اللى بتحبه وتعرفه صح من اول احلى ميزة فيه لاسوء عيب وتتكيف مع الاتنين باريحية تامة وكل ده طبعا محتاج عشرة وخبرة ووقت يعنى ياتبقى لماح وعاوز الحب كشعور منفصل عن اى هدف تانى ياتستنى لحد مايبقى عندك ستين سنة عشان تلحق تعرفه صح

seven يقول...

اهوه ده اللى انا عاوز اوصله
الحب اللى مش ملوث ده
صعب جدا نوصله فى الزمن ده
وهيه ديه المشكلة

حروف يقول...

بص احنا بنتولد بيةحب الالة حب الابناء حب الابن للام وللاب حب الاخوات يعني ايامالرسول صلي الله علية وسلمكان بيحب السيدة خديجة والسيدة عائشة اكتر زوجات احبهم شوف كان بيعاملهم ازاي الحب مش دباديب وهداية ولاكلمات احساس بيطلع في معاملةفي تصرف واحيانا بكلمات انما انا معاك بئا ان الحب اتغير وبقا مقتبس من التلفزيون وبقينا بنقلد وبنحلم بلممثلين وقصص الحب في الافلام التداخل جة عندك من كدة في فرق ياريت اكون وضحتة سعيدة بوجودي في مدونتك

موكا يقول...

موداااااااااااااااااا
انا معاك جداااااااااااااااااا
الحب النقي
او الطاهر
ده فعلا بقه نادر جدا جدا جدا جدااااا
فعلا احنا التلفزيون والغرب
والاغاني لوثت مشاعرنا
بس مادام فيه ناس زيك
لسه بيفكرو
ولسه عايزين النقاء يرجع
يبقه اكيد هيرجع ان شاء الله
بجد بشكرك ع الموضوع
قشطه عليك